繼前年十月特首辦招聘五級家務員後，政府依家又再請一名二級家務員，點知有傳媒就上綱上線話特首辦連家傭都「跳船」喎。
其實呢份工嘅入職要求，必須有最少九年在大戶家庭、大型飲食機構或酒店擔任中廚職務嘅經驗，而且仲要精通中菜烹飪，同識流利粵語及簡單英文添，睇完就知請嘅係廚師而唔係家傭啦，而且咁嘅人才非常搶手，做得好仲可能有好多公司爭住請添！
目前特首辦嘅管家及一至五級家務員共有二十三人，二○一二年因為有家務員退休，所以都登過廣告請五級家務員。
而今次招聘呢個職位亦係填補空缺，主要服務特首一家及到訪嘅賓客為主，負責設計餐單、採購食材及喺官邸、粉嶺別墅或其他場合提供餐飲服務。一旦獲取錄之後，會以公務員合約條款受聘，為期三年，所以薪酬會按總薪級表第十三點（每月22,165元）至總薪級表第16點（每月25,685元）而定，而且仲有約滿酬金添。