平台有僭建 屋署話之你
「差唔多座座嘅平台都有僭建，有啲仲成個單位咁大，點解離譜成咁政府都可以唔理？」周小姐（化名）數年前遷入紅磡新邨，發現屋苑內最少有七座大廈平台出現僭建物，大部分更採用密封式設計，裝有窗戶及冷氣機。周不滿政府多年來一直無視情況，令違規僭建有增無減。
屬優先取締類別
屋宇署發言人證實，本報轉介所述的七幢樓宇平台皆有僭建物，該署已於○七年按當時法例向有關業主發出警告通知，而根據一一年新修訂僭建物執法政策，有關僭建物屬須優先取締類別，該署已就其中五幢樓宇分別向有關業主發出清拆令，亦將按序向另外兩幢樓宇的僭建物業主發出清拆令。
周小姐認為，屋宇署發清拆令後仍需積極跟進僭建物清拆進度，以免違規業主「拖得就拖」，「如果出清拆令之後又唔嚴格執行，只會搞到問題愈嚟愈嚴重，屋宇署唔應該要等到有意外發生先肯做嘢！」