上星期正式出任新聞統籌專員（IC）嘅馮煒光，連日伴隨特首梁振英（CY）出席公開活動。不過，撇低CY嘅馮煒光尋日趁大批記者到政府新聞處「lock-in」預覽施政報告內容時，率先展現「白宮發言人」風範，除咗提醒記者喺房內嚴禁攝錄，仲創先河提供施政報告導讀服務。
對比上手鄧惠鈞（June）嘅低調作風，自稱公關專家嘅馮煒光風格就截然不同。話說記者準備就施政報告向「政府消息人士」套料前，馮煒光突然走到會議室中間，振振有詞向記者簡介報告重點內容，不但做足功課引述項目所在頁數、段落，又主動提供報告嘅中英文版字數，仲預計CY可以兩個鐘內讀完報告，令在場記者慳番唔少功夫。
不過，CY尋日下晝舉行記者會時，負責主持大局嘅馮煒光，記者會未夠限時四十五分鐘，佢就提早宣布結束，又有個別傳媒機構投訴佢點解無畀佢哋提問。
但係相比起去年嘅施政報告記者會，阿June亂咁點人，令到某家傳媒機構可以有成三、四位記者發問，而有人就由頭舉手舉到尾都畀佢當透明，馮煒光今次初試啼聲已算僅僅合格。