政情：施政鹵「網」綱領變網領

一份施政報告除咗內容要精簡扼要外，文筆都要通順流暢，先唔講尋日公布嘅施政報告文筆好唔好，但我哋就發現施政報告網頁內，竟然出現錯字。施政報告網頁左邊分目欄上嘅「施政綱領」，有人錯手寫成施政「網」領，唔止繁體版網頁出錯，連簡體版網頁都錯埋。幸好政府中人好快收到風，尋日下晝五點已經急急腳改番啱個字。其實施政報告網頁一定事前籌備咗好耐，理應有時間做校對，希望明年唔好再出現呢類低級錯誤喇。