政情：貪曾落台 漁農業「重生」
本港嘅漁農業一直都被人視為夕陽行業，但漁農業立法會議員何俊賢（高佬賢）上任後，連續兩年施政報告都有提出政策協助漁農業發展，先有去年嘅五億元漁業持續發展基金，後有今年嘅檢討農業政策，可以話係大大提升漁農業界地位。漁農界起死回生，原來唔係高佬賢腳頭好，而係「貪曾」前特首曾蔭權爵士在任時睇唔起漁農業，等業界自生自滅。
高佬賢唔敢邀功
對於漁農界接連獲得重視，高佬賢就話唔敢講自己腳頭好，只係上屆政府唔注重漁農業，貪曾在任時更禁止拖網捕魚，向業界開刀，仲要冇後續計劃畀番業界，先至令業界要自生自滅。依家新政府上場，加埋立法會嘅配合，雙劍合璧，先至令漁農界跑出，佢話最好政府對漁農業「天天講、月月講、年年講」喎。
咁佢又有咩大計呢？佢話依家喺農民、農村、農業、農地呢四農問題中，農地係最大問題，皆因唔少農地都變咗做倉庫，又或者等緊改變用途、被收購等，有農民租用農地兩個月續租一次，想發展高增值產業都唔得。佢希望政府可以規劃整合農地，再分拍畀農民，等佢哋發展農業都有啲保障咁話。