政情：內地生積極港青富創意

啟剛話，由於佢經常要往返南沙工作，年中接觸唔少內地青年，講到中港兩地青年嘅分別，佢就話其實好難比較，事關喺中港融合嘅前提下，大家都係一家人。不過，佢就好欣賞內地青年無論讀書定學英文都非常積極，加上佢哋父母好多都讀書唔多，所以知道屋企人嘅期望，變得好有責任感。佢又話，內地嘅進步係循序漸進，一步一步嚟，唔係一步登天，而目前喺好多敏感嘅國際議題上，內地都有發聲。

籲學民思潮表訴求須守法

至於本港青年就喺創意方面比較強，但佢認為本港青年人應該放眼世界，關注更加多國際、兩岸及國內嘅時事，吸收多啲唔同嘅睇法，用唔同角度去分析事物。對於有人話睇得多新聞令部分學生對內地反感，佢話呢樣係個人判斷嘅自由。對於學民思潮嘅評價，啟剛覺得香港係個可以自由表達訴求嘅地方，但同時《基本法》係香港發展嘅根基，任何人發表意見嘅時候都必須守法，例如闖入軍營呢啲行為就唔應該發生喇。

對於剛發表嘅施政報告，啟剛話唔想打分，因為政府已經好努力推出措施去解決問題，例如房屋問題，認為部分青年反政府並非因為買唔到樓，只係需要一個長遠嘅私人空間。佢又認為，政府應諗吓點樣提升副學士喺商界嘅認受性，增加學位數目成本高，唔係長遠解決方法。佢又話，最缺乏幫助嘅係嗰班人，並唔係最頂尖又唔係最弱嘅一群，希望政府會撥番多啲資源畀佢哋喎。