中環出更：唔洗手捽眼 田二少「矚目」
特首尋日發表施政報告，卓妮都有去立法會湊熱鬧，見到立法會議員田北辰（田二少）眼紅紅，莫非佢聽到太多福利同扶貧政策，但就冇乜支援中小企發展有關？田二少解釋，自己素有用手捽眼嘅習慣，近兩個星期又不停落區同街坊握手，之後因為覺得隻眼有啲痕，就順理成章用同人握過嘅手嚟捽眼，點知過咗幾日，佢發現兩隻眼變得又紅又痕，心知不妙。
又紅又痕頂硬上
田二少最後都去咗睇醫生，點知個醫生只係畀咗支眼藥水佢滴，滴足幾日都唔覺好轉，又紅又痕，仲好似有轉壞嘅迹象，搞到佢愈來愈擔心。本來佢諗住尋日早啲去睇醫生，可惜撞正發表施政報告，於是惟有頂硬上去埋記者會，之後先急急腳去搵眼科醫生林順潮求診。林順潮早前因成功幫山西男孩小斌斌植入義眼而廣為人識，田二少話自己同林順潮相交多年，一直都搵開佢睇醫生，希望對方幫佢搵到真正病因喎。
卓妮