中環出更：企業傳承能者居之
中國人喜歡子承父業，但面對富不過三代嘅「魔咒」，好多企業家為交棒都挖空心思。城中幾位企業家尋日雲集理工大學舉行嘅傳承學院啟動典禮，分享傳承秘笈，大家樂集團主席陳裕光教子女由低做起，含住金鎖匙出世嘅兒子陳浩弘（Robert），一樣要喺快餐店做樓面；廖創興家族後人兼熙辰國際主席廖偉芬（Jennifer）就拒絕一畢業就靠父蔭，寧願在外打拚十年，創出飲食王國。
交棒學問，各師各法。陳裕光尋日以傳承學院榮譽主席身份分享交棒心得：「不謀一時，應謀一世；不謀一子，應謀全局」，一句講晒，就係計好晒數。佢亦講得出，做得到，其兒子Robert曾被派去快餐店學沖飲品「黑牛」，起初雞手鴨腳，將雪糕「撞」入汽水，水花四濺，狼狽到極。不過，Robert依家喺內地已創立麵包王國，沖「黑牛」嘅趣事，已成奮鬥回憶。
交棒謀全局 接棒忌急進
同樣做飲食起家嘅Jennifer，近兩年帶起香港精品咖啡文化，大膽創新，原來兒時全靠爸爸常帶佢歎完咖啡行山頂。Jennifer記得細個時爸爸經常叫佢「企高啲」，佢起初以為係為咗睇風景，但長大了後，才知爸爸想佢明白，企高啲、睇遠啲，不要犯當局者迷嘅大忌。
至於叙福樓集團執董黃傑龍，十年前回港接掌父親創辦嘅酒樓生意，起初佢要求爸爸只將一間小店交給畀佢做「特區試驗」，大膽試新嘢。佢話，接棒忌急進，否則好易拖垮全盤生意。
九龍表行董事總經理黃錦成就主張有能者居之，部署三年後將生意交畀姪仔黃嘉恆：「生意唔一定要傳畀子女。」佢更反對家族成員為分身家而對簿公堂，因為「萬般帶不走」，和氣生財喎。
卓妮