政情：今日你上鏡：政助陳百里淪攝影師

前觀塘區議員陳百里自三月過檔政府、出任商務及經濟發展局政治助理後唔多見影，原來做咗局長蘇錦樑（Greg蘇）嘅專用攝影師。Greg蘇尋日又出巡，擔任動漫活動嘅頒獎嘉賓，由Greg蘇坐喺台下、上台頒獎以至參觀展品，陳百里都好似Greg蘇嘅御用攝影師咁，拎住傻瓜機捕捉老闆嘅一笑一顰，堂堂高官同一眾攝記行家爭位影相，真係我見猶憐，估唔到月入十萬元嘅政助都要做「龍友」，就連Greg蘇接受訪問時，陳百里都只係默默做佢背後嘅男人。其實呢啲攝錄工作一向由政府新聞處包辦，陳百里千山萬水入政府斷估唔係為咗影相啩？