政情：「特首」之苦 健波嘗盡
過往有唔少立法會功能界別議員成功轉戰一人一票選舉嘅例子，最新一個係保險界議員陳健波，不過唔係講緊區議會或立法會直選，而係佢住緊嘅南區豪宅屋苑貝沙灣嘅業主委員會選舉，而且仲當選主席添。健波形容管理一個大型屋苑，真係同做政府管治成個香港有啲相似，同樣要面對批評、圍堵、拉布、同有關利益衝突嘅抹黑指控，必須以「開誠布公」態度應對，總之做到成個貝沙灣特首咁款。
憑議員經驗 主動反駁指控
健波上屆已做開業委會委員，早前嘅換屆選舉中佢以最高得票連任，之後仲喺其他委員推舉下當選主席。健波成日埋怨立法會拉布浪費光陰，仲邊有時間做業委會主席呢？佢自言今次參選，同一眾放棄高薪私人業務加入「熱廚房」嘅問責官員一樣，都係立志為居民服務，個人少少犧牲在所不免。
即使健波強調自己「執政為民」，但由於業委會每年開支高達二億元，佢同佢嘅競選團隊未上任就面對連番指控，質疑佢哋參選係為咗自己利益，甚至話佢哋畀屋苑所屬嘅地產商收買咗。面對種種指控，部分委員認為「清者自清」，根本唔使理會，但做開議員嘅健波就深明「你唔否認，人哋就當你默認」嘅道理，主張主動、高調、同巨細無遺咁逐點書面反駁。
健波又透露，佢哋召開業委會會議同業主大會時，都遇過有人圍堵同拉布，有時搞到凌晨三點都未開完，但見慣立法會拉布大場面嘅佢，就強調任何會議開足三粒鐘都未開完，就再開落去都無意思。
佢當選主席後，有次開會開到晚上十點幾就搞掂，其他委員立即鼓掌，讚佢主持會議效率高。健波嚟緊仲會主動出擊，推出會見居民計劃。
唔少政界人士都係透過參選區內屋苑嘅業主組織，建立關係網同接觸居民，再鋪路參選區議員以至立法會議員。健波當選貝沙灣業委會主席後，就有人問佢係咪有意轉直選，當區現任區議員泛民嘅司馬文，亦立即主動拜會佢試探兼拉票。健波強調佢連功能界別議席都未必會連任，更何況係區議會同立法會直選呢？大家真係諗多咗喇。