中環出更：女茶王優雅黃家和勁讚
由「咖啡大王」升呢做酒莊莊主嘅咖啡紅茶協會主席黃家和(Simon)，上月忙完金茶王大賽，又做「義工」幫貿易發展局四出推廣港式奶茶。Simon月前購入嘅一個法國酒莊，眨眼就到葡萄成熟時，佢下月頭將飛往波爾多，見證第一批「心血」面世。礙於莊園尚未裝修好，佢未敢邀請賓客前往，但身兼中華廠商聯合會常董嘅佢笑言，會內成員經已磨拳擦掌，諗定明年九月組團包機去酒莊飲個痛快！
日前Simon舉辦金茶王慶功宴，請埋鴻福堂集團主席謝寶達、彩福集團董事長何志強、沙嗲王主席鄭捷明、扒王之王創辦人李德麟等飲食界巨頭，以及歷屆金茶王及鴛鴦王聚首一堂。今年總決賽誕生咗首位女茶王莫佩玲，上海同多倫多賽區又由女性奪冠，Simon大讚女性沖茶嘅每個步驟特別仔細，動作又優雅，得獎實至名歸。
三年後推有機靚酒
Simon話，本來酒莊九月底就有葡萄收成，點知遇着落冰雹延遲咗收成，預計明年該酒區嘅佳釀產量下跌，價格會上漲。Simon有意改革酒莊做有機種植，三年後將有首批有機靚酒面世，到時佢旗下嘅紅酒品牌都有出售。佢透露，已有朋友搵佢度身訂造以個人命名嘅紅酒。Simon公子黃浩鈞(Howie)帶埋太太Iris及愛女Olive舉家現身，卓妮見Howie瘦咗，佢話近日同菁英會一班成員學打泰拳，唔知係咪受咗某套電影影響，想練出六嚿腹肌呢？
卓妮