粵劇大老倌肯參與義演的人不算多，畢竟行業以表演藝術「搵食」，司徒翠英自言只是平衡「搵食」和服務社會，不過無論是何種演出，觀眾的專注投入都為她帶來成功感，「試過有次喺青衣表演，原本好嘈嘅地方因為觀眾專注而好靜，之後就算落雨，佢哋都冇走，擔住把遮繼續睇，台下一片『遮海』！」

工作人員變「粉絲」

兩年來，她為支持黎麗霞而多次義演，期間更吸引聽障工作人員成為其「粉絲」，「每次演出之後，都有位聾啞人士好激動咁對我高舉手指公，示意我做得好好！」善事以外，她亦想藉義演粵劇，培養不同界別和年齡層的市民對粵劇的興趣，推動本地粵劇發展。