本港社運人士楊匡同佢嘅親密戰友內地維權人士劉沙沙，前日喺內地一同被國保人員強行帶上警車，兩人其後已先後獲釋。原來楊匡當日喺警車上除咗抗議國保人員無理扣禁外，亦即場向劉沙沙浪漫求婚。雖然佢哋只係識咗六個星期，但冧爆嘅劉沙沙諗都無諗就應承咗，連在場國保都有恭喜佢哋。
楊匡同劉沙沙早前一齊去北京嘗試探望被軟禁嘅劉曉波太太劉霞，就此撻着愛火，並於個多禮拜前喺網上公開情侶關係。楊匡今次冒險返內地，其中一個目的正係帶沙沙「見家長」。佢同沙沙被帶上警車後，佢好擔心沙沙之後嘅安危，於是激起求婚念頭。
不過佢估唔到嘅係，當佢細細聲問沙沙可唔可以嫁畀佢，沙沙竟然大聲叫在場嘅國保人員幫佢哋見證，其中大部分國保都畀佢哋嘅大膽行為嚇呆咗，但當中一位疑似較高級嘅國保就處變不驚，好大方咁恭喜佢哋。
之不過楊匡同沙沙嘅喜訊傳出之後，隨即有人喺網上自稱係楊匡嘅私生子，狠批佢冇盡到做父親嘅責任，近年仲同時欺騙多名女性感情。楊匡承認有過一段失敗嘅婚姻，但相信前妻同兩個仔都唔會咁樣攻擊佢，其他嘢就唔想多作回應喇。