政情：忽巡威院急症室 肥胡揀錯時間視察
本報早前獨家踢爆沙田威爾斯親王醫院急症室有大批醫護人員離職，出現嚴重人手不足，做殘留低嗰班醫護人員，可能要喺下個月由北區嘅醫院調派人手過嚟幫拖。尋日我哋撞到醫院管理局主席胡定旭（肥胡）現身威院急症室，佢一見到我哋就急急腳行開，好似好神秘咁，唔通佢係睇咗本報報道之後，專程到威院急症室突擊視察？
一支公現身四圍望
肥胡喺尋日約五時許，一支公去咗沙田威院急症室，喺多處望咗幾吓就行番入醫院內部，無回答記者提問。據目擊過程嘅威院職員透露，肥胡除咗去急症室周圍行吓，亦有同啲同事打招呼，期間同一名護士傾咗幾句，但唔清楚詳細對話內容，亦無聽聞有醫院高層出嚟接待佢。
不過嗰位職員指出，每逢長假期嘅頭一、兩日，一般都冇咩人會去醫院急症室睇醫生，因為好多人都出外旅遊，加上尋日天氣唔好，急症室輪候人數亦特別少，質疑肥胡揀錯時間嚟視察，睇唔到佢哋做到氣咳嘅真實情況，建議佢喺復活節假期尾段，大批放假放到病嘅市民雲集急症室時先再嚟睇過。