政情：勞聯換屆 潘少居副
港九勞工社團聯會（勞聯）日前改選領導層，喺去年九月新當選勞工界立法會議員嘅原勞聯主席潘兆平（潘少），同原副主席吳慧儀互相交換位置，另外兩名副主席就分別由勞工界選委林振昇同譚志聰出任。
留力專注議會事務
眾所周知立法會工作愈來愈繁重，如果碰上泛民拉布，議員更須「日以繼夜、夜以繼日」開會，潘少今次卸任勞聯主席，有助佢留力專注議會事務，吳慧儀「坐正」就希望可加強勞聯內部工作。其實吳慧儀今次升任勞聯主席，事先都有迹可尋，早前佢就卸下做咗多年嘅勞工顧問委員會僱員代表，不過轉頭政府又委任番佢做僱員再培訓局成員，公職依然多籮籮。
正所謂「新人事，新作風」，明年適逢係勞聯成立三十周年，加上新領導層上場，據聞該會已定下目標，將會員人數由目前嘅四萬人，喺一年內增加三成至五萬二千人，換言之平均要每個月增長一千人。至於勞聯轄下嘅屬會數目，亦希望由目前嘅九十個增加至一百個，即差不多每月新增一個屬會，唔知最後係咪做得到呢？