中環出更：詩姐歎咖啡 度橋駁泛民
泛民主派對全國人大法律工作委員會主委喬曉陽嘅「愛國愛港」言論大為緊張，質疑中央違背喺香港落實真普選嘅承諾，但基本法委員會副主任梁愛詩（詩姐）周四晚喺中環大會堂出席一個劇團酒會時，就直指特首必須「愛國愛港」係係人都識「common sense（常識）」，唔明點解咁顯淺嘅道理都引起爭議，講得擲地有聲。原來當晚佢出席活動之前，曾經去過附近一間咖啡店買咖啡同蛋糕食，唔知佢係咪一邊歎住咖啡蛋糕，一邊搵靈感反駁泛民嘅歪理謬論呢？
同「中產」齊齊排隊
周四下晝約五點鐘，卓妮見到詩姐單拖現身中環歷山大廈，佢左手挽住把雨遮同小手袋，右邊膊頭孭住個環保袋，行入一間連鎖咖啡店。由於撞正放工時間，有大批「中產人士」排隊買咖啡，詩姐亦好守規矩咁默默排隊等候，等咗一大輪先買到杯咖啡同件蛋糕。
詩姐之後搵咗個位準備坐低慢慢歎，但未坐定就收到個電話，傾完電話之後見佢加快速度，唔夠十五分鐘就食完嘢，起身向置地廣場方向離開，非常匆忙。
卓妮