中環出更：吳克儉「止痕」全靠情侶錶
維繫一段婚姻殊不簡單，所以坊間有「七年之癢」嘅講法，教育局局長吳克儉就信到十足。早前吳克儉現身鐘錶業總會就職典禮，卓妮見佢戴住某個名牌嘅經典腕錶，細問之下，原來隻錶係佢同太太結婚七周年時買嘅情侶錶，至今已戴咗廿幾年。佢笑笑口話，當年擔心太太有「七年之癢」，所以買嚟氹老婆喎！
太子珠寶鐘錶主席鄧鉅明都有到場，佢話吳克儉隻錶屬中價錶，笑稱啱晒「克儉」兩個字。當晚到賀嘅仲有商務及經濟發展局局長蘇錦樑、工業總會行政總裁蘇家碧等人。
區宇凡睇好啟德新機遇
鐘錶業界老中青三代亦空群而出，包括鐘錶界老行尊孫秉樞及囝囝孫大為、九龍錶行董事總經理黃錦成及囡囡黃雅芝、總會前主席朱繼陶及囝囝朱國良，仲有喜運佳常董梁青華嘅囝囝梁仲元以及籌委會主席兼馮良記錶行太子女馮子琳，一班年輕人將晚會搞得有聲有色。
冧莊做主席嘅區宇凡、副主席高鼎國、張繼東及黃麗嫦，成晚滿場飛招呼賓客。區宇凡話，本港已經取代美國成為瑞士錶最大嘅出口市場，雖然業界受到租金飆升、內地個人遊旅客購買力削減等因素影響，零售銷情升勢放緩，但預計六月啟德郵輪啟用之後，可吸引更多遊客到港旅遊，特別係中東、印度等新興市場旅客，為業界帶來新機遇。
中華總商會副會長莊學山嘅細佬莊學海都有去撐場，卓妮見佢同老友香港錶廠商會會長黎衍橋好好傾，拎住酒杯周圍去敬酒，睇嚟心情唔錯。莊學海父親莊靜庵創辦嘅中南鐘錶，已由莊學海揸弗，錶行依家喺內地已有四百幾個零售點，發展唔錯。
卓妮