政情:大輝 唐唐 笑看「英熊」

因為一場「熊狼鬥」,令本來沉寂咗幾個月嘅政壇再起風雲,唐營「家臣」、中華廠商聯合會立法會議員林大輝話,自從全國政協委員劉夢熊突然向周刊「爆料」後,佢心情勁靚,有時瞓覺都識笑,仲係笑到甜絲絲嗰種喎。大輝又透露,佢同唐英年通電話時,都有傾過呢單嘢,唐唐都係一味笑,總之兩人講起呢個話題就眉飛色舞,完全係隔岸觀火。

大輝尋日同傳媒聚會時,仲話劉夢熊既然爆到咁多料,應該盡快提出證據,否則好容易被人告誹謗,佢話唐唐對呢個講法都好認同;佢話如果提出唔到證據嘅話,就應該遵守諾言去跳樓,事關呢個指控實在太嚴重喎。大輝亦建議特首梁振英(CY)要盡早告劉夢熊,以還自己清白。

仲未有政黨招手

外界盛傳劉夢熊投靠CY陣營前,一度向唐營自薦。大輝話,劉夢熊選舉前的確有搵佢傾偈,但從來冇話咩拉線。講番大輝自己,佢早前自爆想加入政黨後,到現時都冇政黨向佢招手,雖然佢同自由黨關係最好,同新民黨葉劉淑儀亦經常有偈傾,但兩黨都冇開口叫佢加入,唔知係咪唔鍾意佢喎。

第一手消息請下載on.cc東方互動iPhone/iPad/Android/Windows Phone Apps