因為一場「熊狼鬥」，令本來沉寂咗幾個月嘅政壇再起風雲，唐營「家臣」、中華廠商聯合會立法會議員林大輝話，自從全國政協委員劉夢熊突然向周刊「爆料」後，佢心情勁靚，有時瞓覺都識笑，仲係笑到甜絲絲嗰種喎。大輝又透露，佢同唐英年通電話時，都有傾過呢單嘢，唐唐都係一味笑，總之兩人講起呢個話題就眉飛色舞，完全係隔岸觀火。
大輝尋日同傳媒聚會時，仲話劉夢熊既然爆到咁多料，應該盡快提出證據，否則好容易被人告誹謗，佢話唐唐對呢個講法都好認同；佢話如果提出唔到證據嘅話，就應該遵守諾言去跳樓，事關呢個指控實在太嚴重喎。大輝亦建議特首梁振英（CY）要盡早告劉夢熊，以還自己清白。
外界盛傳劉夢熊投靠CY陣營前，一度向唐營自薦。大輝話，劉夢熊選舉前的確有搵佢傾偈，但從來冇話咩拉線。講番大輝自己，佢早前自爆想加入政黨後，到現時都冇政黨向佢招手，雖然佢同自由黨關係最好，同新民黨葉劉淑儀亦經常有偈傾，但兩黨都冇開口叫佢加入，唔知係咪唔鍾意佢喎。