政界人物最緊要飲水思源，早前外號「西環契仔」嘅立法會議員謝偉俊曾爆料話西環喺九月立法會選舉幫佢拉票，結果被外間直斥佢「食碗面，反碗底」。殊不知事隔多時，喺特首選舉中被視為梁振英（CY）支持者嘅全國政協委員劉夢熊，近日突變成「倒梁重炮手」，接受雜誌訪問爆料指CY曾向佢承諾委任佢做行政會議成員及推薦佢做全國政協常委，事後又多番發表聲明冷嘲熱諷咬住CY唔放，難怪有資深親中人士一針見血，批評劉夢熊做埋啲「食碗面，反碗底」嘅事喇！
