政情：楊孫西係時候唔做政協常委

香港區全國政協委員名單聽聞最快會喺本月底公布，之前已確定嘅港區政協常委空缺有四個，包括因參選特首辭職嘅特首梁振英、因「新地案」被廉政公署起訴嘅前政務司司長許仕仁、前中聯辦副主任黎桂康以及年前逝世嘅商人徐展堂，最近又有一人確定會退下火線，呢個就係現年七十四歲嘅民建聯監委會主席楊孫西。據聞楊孫西個空缺，有機會由福建社團聯會主席林樹哲或全國政協、本身同楊孫西好老友嘅盧文端頂上，兩人中又以前者機會被看高一線。

楊孫西話，下屆政協嚴格執行年齡限制，七十歲就要退落嚟。其實楊孫西喺○三年第十屆全國政協已開始擔任常委，都已經做咗十年喇。