政情：蔣麗芸長毛立會演「鬧」劇
向來講嘢聲線好似阿媽教仔嘅立法會議員蔣麗芸（Ann），繼早前為特首梁振英（CY）大宅僭建護航後，尋日又再撲出嚟為保護市區重建局主席張震遠，不惜同社民連「長毛」梁國雄開片，喺立法會發展事務委員會會議上對罵足足三分鐘。
發展事務委員會尋日傾施政報告，長毛先講CY大宅僭建，又提到張震遠係CY身邊嘅大紅人，但佢嘅商品交易所冇交易，分分鐘執笠，一個生意失敗嘅人……，長毛講講吓之間，阿Ann突然發難，指斥長毛離題，叫委員會主席劉皇發令長毛收聲。長毛即時連珠炮發回敬：「張震遠係你邊位？關你咩事？你係咪傻o架？傻嘅就睇醫生！呢度係蔣家咩？你叫主席做嘢？你返蔣家搵個妹仔畀你管，斟茶遞水，遞埋拖鞋，喺度發大小姐雌威？發神經！」
最後阿Ann都係無力招架，只係重複叫長毛收聲，又話長毛廢話。期間發叔勸交：「我哋時間唔多，大家停口，講施政報告。」結果都係冇用，而地產建造界石禮謙就喺兩人對罵尾聲之際抽水：「如果佢哋鍾意嗌交，可唔可以出去嗌？」發叔最後話：「梁國雄停停先，請你言歸正傳。」呢場精彩嘅鬧劇先至告終。