男人暫別妻兒、離鄉別井到外地工作，難免會感到寂寞，即使係中央駐港官員都唔例外。一位代號「口水佬」嘅中高級已婚中央駐港官員，就被指頻向相熟嘅單身女記者傳送曖昧手機短訊，令女方不勝其煩。事件最近鬧上社交網站，有人為免事件曝光，使橫手向相關人士所屬嘅傳媒機構施壓，要求刪除有關網上留言，真係醜上加醜。
「口水佬」獲調派來港可能因為同老婆長期分隔，感到寂寞同「無王管」，開始周圍發短訊畀啲相熟嘅單身女記者談心，尤其係嗰啲做開左派傳媒機構同中港新聞、樣貌端好嘅女記者。基於工作關係，唔少女記者都不情不願咁回覆「口水佬」，但對方之後發嘅短訊內容愈嚟愈離譜，令人覺得佢唔係單純想傾偈咁簡單。
為免得失呢位「北大人」，好多受到滋擾嘅女記者都敢怒不敢言。其中一位「受害人」向好友A透露事件後，好友A擅自將事件寫上微博，之後立即有人向好友A所屬嘅傳媒機構施壓，有關微博留言亦隨即被剷走，非常黑暗。好心「口水佬」作為有婦之夫就檢點啲啦，否則搞到出咗事，成為新聞就笑死人喇。