政情：任亮憲棄政治專心搵銀 維園阿哥再現
維園阿哥任亮憲兩年前風頭一時無兩，先喺維園彈起，再喺社民連成名，過檔人民力量後依然有份喺區議會選舉狙擊工聯會陳婉嫻。但自從佢捲入一宗涉嫌強姦案後，政途好似無乜起色。尋日佢再度公開現身出席活動，不過任亮憲堅稱只係撐老友，自己已經完全退出政壇，現時專心幫人搞基金搵真銀。
由青年民建聯主席周浩鼎牽頭而成嘅「香港青年時事評論員協會」尋日舉行成立典禮，任亮憲唔係成員，但佢話喺維園已經識周浩鼎，點都要捧吓場喎。任亮憲話依家回歸金融行業，專責幫客仔成立基金同信託基金，最近都要周圍飛，所以短期內唔再玩政治。
佢又斬釘截鐵話，自己再唔係人民力量任何成員，似乎好想同人力劃清界線。不過佢都講得無錯，因為佢尋日一話參加周浩鼎搞嘅開幕禮，即刻喺網上畀人力支持者鬧爆佢加入建制，所以佢同人力支持者應該勢成水火。雖然退出政壇言猶在耳，佢又話要回歸政壇最快要二○一六年喎，睇嚟佢都係暫時退出啫。