政情：民記接班 立立亂

喺九龍嘅東同西，以年輕區議員較多，個個都年輕有幹勁，要上位當然要爭崩頭，所以已經開始有人擔心下屆立法會換屆時，民記會立立亂。

喺九龍東，上屆選舉結束後已考慮退位嘅九龍東立法會議員陳鑑林（橄欖），今年九月已經係被迫再參選，皆因排喺佢後面嗰幾個青年代表，包括黃大仙區議員黎榮浩及三名觀塘區議員柯創盛、洪錦鉉及陳百里鬥得太過難分難解，所以橄欖惟有頂硬上做多屆，不過問題無因為佢再選而解決，只係推遲咗。橄欖已經講到明，無論如何，今屆立法會過後一定會退落嚟喎。

呢場「廝殺」邊個會勝出，實在係未知之數。其中陳百里如果真係加入政府做政治助理，可能就係表示佢退出呢場競爭，餘下嘅三人，全部都有待升呢。

九龍西又有另一種境況，呢區本來都係年輕黨員競爭激烈，後來殺出議會新丁、但非議事新丁嘅九龍西立法會議員蔣麗芸（Ann姐），至將局勢暫時擺平，有傳話佢只會選一屆，以讓民記可於當區順利過渡。但對於呢個講法，其實Ann姐一直都未作正面回應，佢淨係話一切要由個黨安排。Ann姐以下，就係深水埗區議員鄭泳舜同油尖旺區議員葉傲東，二人鬥得難分高下，四年後如何，真係好難預料。唔知Ann姐最後係咪要重蹈橄欖嘅歷史，做多屆暫且按下年輕黨員嘅爭鬥呢。

主席譚耀宗都無得退

黨黨有本難唸的經，有年輕人接班嘅政黨都有佢嘅煩惱，情況可能比連年輕黨員都唔多個嘅政黨好。民建聯領導層都有佢哋嘅問題，黨主席譚耀宗咪亦都係一樣，頂完一屆又一屆？