中環出更：校友聚首話當年
老牌男校皇仁書院成立百五周年，尋晚喺灣仔會展舉行盛大校慶，二千四百名「皇仁仔」濟濟一堂，盛況空前，原來皇仁淨係出產醫生，都有幾百個咁多。食物及衞生局局長高永文、中文大學校長沈祖堯、金融管理局總裁陳德霖（Norman）等都喺度，已故全國政協副主席霍英東嘅長子霍震霆就代表父親主禮。講起往日喺書院嘅日子，大家各有難忘事。
高永文自製望遠鏡
Norman現時身負重任，估唔到佢舊時係奀皮仔一名。佢話，當年學校有籃球場，但一到放學就唔准用，佢同幾個同學仔施展妙計，喺學校搵碇匿埋，等到五點鐘校工熄燈收工，佢哋就出嚟盡情玩，直到屋企開飯先捨得走。校門鎖咗，佢哋竟然爬牆走！立法會議員胡志偉都係校友，佢自詡係「波牛」，當年朝朝趕搭頭班車返學，就係為咗霸位踢波，午飯時間又走過隔籬維園踢，放學再繼續踢，真係精力十足。
至於高永文就話自己係天文發燒友，以前仲做過天文學會會長，每周都會約埋去觀星，有時為咗欣賞難得一遇嘅天文奇觀，捱更抵夜都濕濕碎，事關年輕吖嘛！佢仲話，當年嘅望遠鏡係自家製，唔少學長畢咗業，副鏡就會代代相傳，充分體現皇仁傳承嘅精神，啲望遠鏡仲保存至今。
沈祖堯就話，讀書最開心係成日唔使上堂，唔係因為逃學噃，係因為當年佢經常參加校際比賽，如果勝出咗，下晝就唔使返學，而佢好多時都贏，所以全日制都變咗半日制。不過佢話咁都有好處嘅，等學生多啲機會自修，發掘知識，間接培養咗佢終身學習嘅精神。
醫生上台大合唱
尋晚嘅餘興節目當然好精彩，有現任立法會議員嘅唔同年代校友上台棟篤笑，石禮謙就話，點解皇仁唔出特首？因為皇仁仔唔識講大話喎。又有高永文、沈祖堯、中大醫學院院長霍泰輝等上台唱歌，但係全部走音，後來佢哋號召其他醫科生上台一齊唱。學港大外科學系主任盧寵茂話齋，皇仁仔都喺唔同嘅崗位貢獻社會。咁多精英聚首一堂，確係難得。
卓妮