仲以為貪曾集團會隨着政府七一換屆從此消失，點知喺上個月廿七日刊登嘅憲報，竟然見到湯顯明個名，真係陰魂不散，畀佢嚇到打咗個突！
當日憲報嘅內容大致係話，廉政專員「湯顯明」授權執行處處長李寶蘭喺七月廿一日至廿三日期間，署任廉署執行處首長嘅職責，但署名就寫番正係白韞六，政府憲報尋日作出更正。
據了解，今次出錯係因為廉政公署人員嘅手民之誤，但英文版就寫啱咗。新任執行處首長黃世照喺七月十九日上任幾日就要搵人署任，原因係佢喺退休期間接到政府急Call，邀請佢出任呢個位囉，所以仲有好多私人事務要處理，要喺七月廿三日（星期一）放假一天，而廉署就安排李寶蘭署任埋之前嘅星期六同日。
法律界人士黃國桐話，呢啲錯誤可大可小，皆因如果嗰幾日署任人行使咗一啲權力，被調查人士可能會挑戰廉署，話呢啲決定係冇法律效力嘅，雖然發生嘅機會係微啲，但唔係話冇可能。