政情：鼠王芬《快樂西九》 歡迎惡搞
立法會選舉候選人各出奇謀拉票，競逐連任九龍西議席嘅西九新動力梁美芬（鼠王芬）都搞搞新意思，將會推出Rap歌（饒舌歌）《快樂西九》，可惜首歌不斷重複「美芬加油、堅守西九」兩句，我哋聽一次已經畀首歌洗腦咁滯。不過，首歌暫時都唔會擺上網，唔通鼠王芬怕被「二次創作」愛好者惡搞？點知佢話：「惡搞咪即係受歡迎囉！」將惡搞當做善意，睇嚟鼠王芬已經冇以前咁睇唔開喇。
鼠王芬自爆之前立法會拉布期間，開會開到悶悶哋，就諗吓選舉宣傳策略，就咁畀佢諗度唱歌仔。為呢首《快樂西九》作曲嘅係創作兒歌《小明上廣州》嘅韋然，而歌詞就係鼠王芬親自填寫嘅，唔怪得歌詞連佢處理過鼠患都寫埋。第一次Rap歌嘅鼠王芬話，錄呢首歌用咗足足三個鐘頭，諗住擺街站宣傳嗌咪嗌到攰時可以播吓喎。經常話幫街坊處理噪音問題嘅鼠王芬，唔知到時會唔會被人投訴佢製造噪音呢？參選九龍西直選嘅名單仲有黃碧雲、毛孟靜、蔣麗芸、黃毓民、黃以謙、譚國僑、黃逸旭及林依麗。