政情：李華明為「錢」途 唔做議員
第四屆立法會上星期落幕，決定唔參選嘅議員準備去過新生活。李華明做咗議員廿一年，佢話對立法會生涯感到厭倦：「以前辯論係唇槍舌劍，依家開口就係鬧人，根本無高水平辯論。」
李華明認為，議會激進勢力抬頭係因為市民對政府愈來愈不滿，緊接將呢種不滿投射到立法會上：「依家搞到議員行為要配合呢班選民，做議員嘅至可以吸多啲激進勢力嘅票。」即係又係曾蔭權呢個弱勢政府闖嘅禍喇。
李華明直言，從政無退休保障亦係他離開嘅重要原因之一：「今屆先新增議員約滿酬金，但係我無理由做多十年先攞嗰筆退休酬金養老o架嘛。」李華明轉行做政治公關，確保要搵到錢，因為佢要繼續供樓同供個女讀書，佢仲會寫專欄及擔任時事評論員添。