政情：另類參選人 挑戰立會議席
立法會選舉通常畀大「集團」壟斷，但亦有另類參選人。自由工作者龐一鳴同牧師陳一華尋日分別宣布喺新界東同新界西參加直選。兩人都話唔擔心會因為得票太低而被沒收選舉按金喎。
卅八歲嘅龐一鳴話，佢嘅參選理念係要反地產霸權，以及為香港「創造更美好嘅事物」。為咗秉持佢拒絕幫襯地產商嘅精神，龐一鳴嘅誓師大會亦拒絕派發宣傳單張，團隊淨係着住印有龐一鳴背影嘅Ｔ恤應戰。龐一鳴話佢會同團隊成員踩單車向市民派發用環保紙印嘅單張，目的係要讓人口耳相傳咁宣揚佢嘅參選理念。
標榜立場中立兼獨立嘅陳一華就話會用關懷嘅心服侍市民，尋日邀請咗港大法律專業學系助理教授張達明撐場。
張達明話同陳牧師有共同理念，雖則兩人交往尚淺，但佢仍然請纓幫手助選。陳牧師就回敬張達明一句，話「好多嘢都係上天安排」，又話會按照聖經上「是其是、非其非」嘅原則進行選舉工程。