放暑假咯，又放暑假咯，去邊度玩好呢？大家千祈唔好誤會，嫉惡如仇嘅功夫茶年中無休，日日為民請命監察社會，絕對唔會放暑假開天窗。放暑假去邊度玩呢個咁疏肝嘅問題，只適用於四種人，一係學生，二係老師，三係議員，四係其他有權抖暑嘅稀有物種，例如騎師與馬，以及球員與波。
講到議員放暑假，功夫茶實在百感交集。你知啦，立法會經常性吵吵鬧鬧，有時覺得好好笑，有時覺得好鬼煩，議員放暑假未嘗唔係一次樂得耳根清淨嘅時機。之但係咁，尊貴議員尊享貴價人工，平時已經死蛇爛鱔不斷偷懶o架啦，居然仲可以放暑假尋歡作樂喎，無福消受高薪厚職嘅小市民睇見會唔服氣囉。
立法會一次又一次因為開會人數不足而流會，議員懶到出汁都算嘞，最可惡嘅係部分擦鞋仔一味阿諛奉承，背棄儆惡懲奸嘅代議士天職。好似前特首曾蔭權貪遍海陸空咁吖，理論上立法會議員有義務為民請命，唔將貪曾剷到上天花板都唔會罷休啦。偏偏不問是非、只問利益嘅保皇派瞓身保駕護航，埋沒良心否決針對貪曾嘅彈劾以及不信任動議。
除咗包庇貪曾，又維護宣揚淫褻嘅傳媒，議員表現咁拙劣，小市民點睇呢？「東方報業民意調查」發現，三成二受訪者認為佢哋只顧自己利益，顛倒是非；三成二覺得冇履行監察職責；兩成狠批呢班大帝變相縱容不當行為。
懶嘅相反係勤力，不過本地政壇有一個相當滑稽嘅現象，議員最勤力嘅時候係玩拉布。小市民又點睇拉布導致立法會多項動議無法提出呢？三成六覺得罔顧公眾利益；兩成三認為改善民生受阻；兩成三直言議員形象愈來愈差。
其他民意調查數據，請恕功夫茶唔再一一詳述嘞，大家有興趣的話不妨揭去新聞版面。功夫茶要繼續講嘅係，今年九月放暑假完畢，正好秋天來臨，適合秋後算帳。喂，既然今屆議員不孚眾望，九月立法會改選之時，大家咪利用手上嘅神聖選票做一次議會大清洗囉，掃垃圾咁樣掃走令人眼冤嘅所謂政治從業員。
呢嗱嗱嗱，選民嘅選擇其實好簡單，邊個夠懶，邊個夠爛，邊個就眾望所歸冇得留低。本地政客經常掛喺嘴唇邊嘅一句口頭禪係「公道自在人心」，何謂公道呢？計功夫茶話齋，選民手上嘅選票就係公道。得選票，得人心，公道就係咁簡單，簡單過「紅黑紅紅黑」。
一於咁話啦，九月秋後算帳，改選立法會之時，選民一人一票掃走爛議員！