政情：半退休陳強 落區搞服務
盛傳今年九月將會參加立法會新界西直選嘅城鄉會會長陳強，本身熱愛體育活動，唔講唔知，原來佢仲係本地甲組球隊屯門嘅會長，尋日係屯門隊今季煞科戰，陳強拉埋老婆同個仔出席支持，仲科水兩萬幾蚊派飲品同食物畀入場嘅球迷，真係相當唔話得。
陳強社會服務一籮籮，淨係社區服務中心都已經自己出錢開咗六間，最早一間仲已經開咗差不多六年。佢話，自己雖然喺內地有生意，不過近年其實已經處於半退休狀態，大部分生意已經交晒畀仔女負責，自己就大部分時間投入地區工作。
坊間盛傳，陳強已經得到大部分元朗區嘅鄉紳支持，嚟緊立法會選舉勢必成為一股不可忽視嘅勢力。佢尋日話，上述只係傳聞，因為未落實，所以冇乜嘢可以講住。不過，如果市民街坊真係認同佢嘅工作，佢又當選的話，佢一定會全身投入，報答支持者。