一首《忘不了你》，教曉港人愛唱歌亦要揀啱歌嘅道理，不過民政事務局副局長許曉暉（Florence）就好似無吸取教訓，前日出席一個籌款活動時，就拉埋歌星黎明同大會嘅董事黃永光一齊高歌羅文嘅《獅子山下》，不過網民就唔多受落，話佢唱得有啲奇怪喎。
Florence話，佢揀《獅子山下》係因為呢首歌代表着本土文化，象徵香港精神，開口埋口都提到文化。網民見到呢位熱門文化局局長高歌都紛紛感到錯愕，話聽佢唱每句最後兩個音總係有說不出嘅奇怪，唔知同Florence唱開粵曲有無關係呢？不過，唱得唔好聽唔緊要，最重要都係籌到錢，當然過程可以滿足埋自己就最好啦！