港府有三多：庸官多、懶蛇多、超級筍工多。頭兩「多」，相信唔使功夫茶嘥口水解釋，只要睇睇食物及衞生局局長周一嶽，再睇睇其他高官點樣做呢份工，就一清二楚喇。至於超級筍工咯喎，功夫茶今日有好介紹，兼職性質，唔使擔、唔使抬、唔使上立法會擋箭，至於人工就犀利咯，係年薪五百萬！
冇錯吖，係年薪五百萬，仲高過年薪四百萬嘅煲呔曾。大家可能會問，煲呔曾貴為港府阿一、特貪之首，乜政府之內仲有人貪過佢咩？其實唔係貪過佢，係人工高過佢就真，多得審計署，令呢份超級筍工絕密曝光。
事情係咁嘅，衞生署○三年起聘請一名大律師擔任兼職法律顧問，為轄下嘅醫務委員會、牙醫管理委員會同脊醫管理委員會提供法律意見，薪酬以時薪計算。嗱，呢位大律師上任以來，時薪一直維持一千九百元，其中○八至○九年度，全年薪酬合共高達五百萬元。衞生署被質疑浪費公帑，事件引起審計署關注，已經就事件立案，如有需要會跟進調查咁話。
唉，呢個政府真係乜事都可以發生，煲呔曾用五百蚊坐豪華遊艇遊濠江，衞生署就以年薪五百萬請兼職，兩件事性質唔同，但一樣令人Ｏ晒嘴。有數得計，年薪五百萬元，即係工作時數為二千六百多小時，以政府每周五天工作計算，即係每日工作長達十小時，比一個全職公務員嘅返工時間仲要長，聽落都搞笑！
講到呢度，畀錢出糧嘅納稅人好自然會問，點解兼職都要返十個鐘頭工？有冇咁多嘢做呀？大家知啦， 衞生官僚平日死蛇爛鱔，家陣突然扮忙碌，好難令人相信啫。退一步講，就算真係有咁多嘢做，咁點解唔索性請個全職顧問呢？公務員就算出晒名人工高，但點都無可能荒謬到高過特首！
一句講晒，衞生署浪費公帑嘅嫌疑，打風都打唔甩㗎嘞，唔係嘅話，審計署都唔使對事件表示「關注」啦！話時話，衞生署家陣應該求神拜佛，千祈咪捲入圍威喂利益輸送嘅官場逆流呀，你知啦，煲呔曾貪腐醜聞震驚全港，港府前二號人物許老爺又捲入貪污醜聞，香港廉潔招牌已經搖搖欲墜嘅喇！
講開又講，衞生署年薪五百萬請兼職顧問係浪費公帑，咁煲呔曾每年白𢭃四百萬人工又係乜嘢呢？嗱，佢真係白𢭃人工㗎，返工唔係傍住富豪黐飲黐食，就係用公帑外訪遊埠，唔止嘥米飯，更加搞到官場烏煙瘴氣。庸官劣吏當道，成個政府咪變咗超級筍工大本營囉。計功夫茶話齋，審計署應該快快做嘢，唔止要查衞生署，仲要查埋貪腐特首呀！