政情：KK想踢小肥張出勞福局？
現屆問責官員邊個可以留任仲係未知之數，於是近日好多官員頻頻曝光博表現，其中一個就係勞工及福利局局長張建宗（小肥張）。工會對小肥張嘅表現毀譽參半，淨係工聯會內部都對佢有讚有彈，好似該會立法會議員黃國健（KK），早前先至勁鬧完小肥張，點知意猶未盡，尋日再次對準小肥張開火，莫非工聯會想踢走小肥張？
KK繼早前講過話想下屆勞福局局長個位有啲新氣象，又讚前勞工處處長謝凌潔貞幾好，完全係衝住小肥張而來。KK尋日仲好坦白話，覺得小肥張推行政策時，有時會拖拖拉拉，尤其係交通津貼及定居內地長者領取福利問題上，直情係處理不當。
KK狂踩小肥張，究竟邊個做局長先至可以令佢滿意呢？抑或純粹因為九月立法會選舉，要鬧吓啲高官造勢呢？