政情：黃宜弘證新港盟非政黨
立法會中總代表黃宜弘（Philip）一直支持唐英年參選特首，雖然佢最後轉軚支持候任特首梁振英（CY），但佢哋嘅關係到底係點就真係無人知。CY早前被人話佢係政黨成員，Philip尋日接受電台一段錄音訪問時話，當年CY加入嘅新香港聯盟（新港盟）只係一個政治聯盟，變相幫手澄清CY唔係政黨成員。
Philip仲話，佢同CY一向都係朋友，但因為大家嘅嗜好唔同，所以見面時都係傾公事居多，好似CY唔係咁鍾意杯中物，所以每年喺北京兩會期間從未叫過CY出去飲酒喎。
當時身為《基本法》諮詢委員會副主任嘅羅德丞，喺八九年創立「新香港聯盟」，CY同Philip都係成員。Philip話，新港盟當年向中央政府提出分組點票，其他成員全部都贊成。最後新港盟喺九一年派出四人參選立法局，最後只係得Philip喺無對手下自動當選。