立法會議員李卓人為首嘅職工盟，尋日趁住復活節假期遊行去候任特首辦，要求候任特首梁振英（CY）上任之後將勞工假同公眾假期睇齊，由依家嘅十二日增加至十七日，仲話當初唐英年嘅參選政綱承諾過畀班打工仔享有十七日勞工假，如果因為CY當選而搞到打公仔無咗五日假嘅話，就係天大嘅諷刺喎。咁講法，職工盟咪等於要CY硬啃唐唐開出嘅期票？
其實工聯會前兩日先要求政府將勞工假同公眾假期睇齊，所以職工盟尋日遊行都係執人口水尾。記得阿人早前充當「唐營C隊」，建議用特權法要求政府公開行會資料，查證CY有無講過「防暴隊論」，依家轉過頭又要求CY硬啃唐唐開出嘅期票，真係唔知CY點樣啃得落。
職工盟呢期的確係畀工聯會搶晒風頭，工聯會上周一見完CY後，尋日會長鄭耀棠又率領屬下專業團體一百六十幾人，浩浩蕩蕩上北京，睇嚟職工盟真係要諗諗計急起直追喇。