中環出更：李鋈麟北上 食物保鏢隨身
內地唔少食物造假，港商返內地公幹都要小心食嘢，好似東華三院總理李鋈麟嘅生意遍布內地各省市，經常都要中港兩邊走，點樣避免「病從口入」呢？佢就諗到一條好橋，就係請個「食物保鏢」，隨身幫佢檢查食物安全，就好似古代皇帝進食前要用銀針為食物驗毒一樣。
曾飲假酒吐血
話說李鋈麟四年前喺內地一個宴會上飲到半醉，飲咗疑似假白酒都不自知，翌日起床時竟然吐血，搞到瞓咗十幾日醫院。自此之後，佢就靈機一觸，帶個本身做廚師嘅「食物保鏢」一齊出門，去到邊跟到邊，試過晒所有食物同飲品都無發現異樣，佢至放心品嘗。
李鋈麟話，內地食物質素真係麻麻，試過食到塑膠雞蛋同變味食物，就算幾高級嘅酒店餐廳都係咁，佢建議經常往返內地工作嘅朋友，不妨考慮請番個「食物保鏢」，到時就算飲到醉醉哋，都唔怕飲到假酒啦！