中環出更：CY「主場」菜館人氣急升
梁振英（CY）當選特首後，佢嘅山東老鄉們莫不欣喜若狂，就連CY經常幫襯嘅灣仔美利堅京菜館都人氣急升，原來菜館創辦人叢樹倫同CY一樣都係山東威海人，可謂同聲同氣。
梁紹莊帶隊歎美食
日前一個晚飯時間，同樣係威海人嘅前山東商會副會長梁紹莊（Tommy）就約埋朋友去美利堅開餐，見佢不停同朋友打招呼，好似返咗自己屋企咁熟落。
當日Tommy叫咗成枱美食，包括韓國泡菜嘅始祖「威海泡菜」、多汁鮮味嘅三鮮水餃及彈牙爽口嘅炸醬麵，雖然唔係貴價山珍海味，但勝在食材新鮮惹味，令人回味無窮。京菜源於山東菜，記得兩年前，CY都曾經向卓妮推介過該菜館嘅美食，佢最愛係糖醋黃魚、沙鍋津白及手撕雞，當然仲有北京填鴨同叫化雞啦！
Tommy話，山東人喺香港已有九十年歷史，好多人嘅交情經歷幾代人，關係密切，好似佢媽媽都姓叢，係菜館老闆叢家嘅親戚，依家菜館已由創辦人叢樹倫嘅囡囡Josephine打理，專心做好京菜同魯菜（山東菜）。
好多人對該菜館名字「美利堅」（American）感到好奇，Josephine就解釋話，六十幾年前，佢爸爸頂下菜館時已叫此名，便一直沿用至今，但菜式就由西式轉為中式。菜館除咗備受中國人喜歡外，洋人食客亦經常高朋滿座，確係食客無國界。
卓妮