話說早前天文台喺尖沙咀美麗華租用嘅辦公室就快到期，於是政府有人獻計，提議將辦公室搬去君怡酒店地庫，一來係政府物業，二來又唔使捱貴租。
不過，喺地庫樓上竟然係金巴利街垃圾站，要聞垃圾站臭味不特止，最搞笑係天文台做預測點都要望吓天，如果搬落地下密室，咪名副其實變咗「地下天文台」？好彩最後成功爭取留喺舊址繼續辦公。
天文台台長岑智明尋日仲透露，天文台地方愈來愈唔夠使，諗緊長遠發展大計，包括原址重建或加建天文台總部。不過，呢個諗法十畫未有一撇，因為擴建受制於歷史建築物問題之餘，仲要顧及周遭居民嘅感受。至於天文台日後能否撤離尖沙咀呢？相信機會不大，睇嚟佢哋要繼續「親密」啲辦公先至得喇。