鄉議局沙田石門新大樓已落成啟用就快一年，但籌建新大樓嘅近二億元建造費，原來仲欠九千萬元債項未還，條數認真嚇人。尋日鄉議局執委會上，秘書長匯報最新嘅欠債情況，指九千萬元欠債當中，建築費佔二千萬元，其餘七千萬元係銀行貸款，當中四千萬元債項已經到期。咁大條數殺到埋身，但局方仲未諗到點還。
據講七千萬元銀行貸款係當然執委何冬青以私人貸款做擔保，否則銀行未必會借出如此巨額貸款予鄉議局，換句話萬一局方無錢還，何冬青就要暫時孭起條數。不過，其實鄉議局並非無錢，而係九龍塘舊址幅地仲未能賣出套現，加上之前有好多籌建新大樓捐款未收回，先至搞到咁手緊，發叔尋日就下令秘書處加緊追收捐款。