一年容易又除夕，二○一一年話咁快已經來到尾聲。按照中國人傳統，呢個係埋單計數嘅時候，所以咯喎，本報投訴版亦照例同港府算一算帳。呢筆帳不算猶自可，一算把幾火，過去一年，官僚部門被揭蛇王、失職、失誤嘅混帳事件無日無之，投訴個案水蛇春咁長，唔怪得夕陽政府嘅民望猛咁插水喇！
嗱，官僚部門敷衍塞責，失誤失職當家常便飯，有數據為證，冇花冇假㗎。全年計數，本報總共接獲逾三萬一千宗讀者投訴，當中接近一半涉及不同政府部門，問你服未？年尾樂壇派成績表，大哥大姐空群出動，而躋身今年投訴排行榜嘅部門一樣星光熠熠，其中以盛產蛇王聞名嘅食環署、房屋署同警務處，佔據榜首三甲位置。
蛇王部門投訴爆燈，可謂實至名歸，佢哋嘅威水史簡直多到數唔晒。尤其係獨佔鰲頭嘅食環署，涉及投訴達三千多宗，平均每日接近十宗，真係玩你唔死，監生激死你！至於經典個案咯喎，咁就不得不讚讚本報嘞，今年中踢爆大埔區小販隊濫用政府資源公然蛇王，浩浩蕩蕩坐政府車輛上酒樓歎茶，圖文並茂，當場斷正。
咦咦咦，奇嘞，點解講咗咁耐仲未見醫管局嘅大名呢？你知啦，本港醫療事故無日無之，層出不窮，害人整人玩人，醫管局認咗第二，無人敢認第一。其實，醫管局並冇令大家跌眼鏡，以超過一千宗投訴個案穩守殿軍位置，而屋宇署就排第五。不過咁呀，醫管局靠害病人唔使擇日，屋宇署打擊劏房、僭建懶得就懶，相信佢哋唔使幾耐，就可以喺投訴榜稱王封后㗎嘞！
講開又講，投訴港府年年爆燈，上榜嘅部門來來去去嗰一大堆，套用煲呔曾嗰句，市民都見怪不怪咯。本報投訴版成立三十五年，政府部門就佔據版面三十五年，就係最佳寫照啦。咪住先，各位港產官僚，唔好話畀功夫茶聽，你哋以躋身本報投訴榜為榮呀？如果係咁，你哋就比「電霸」面皮更厚喇。
嗱，學者同議員講得啱，投訴數字居高不下，顯示政府部門因循官僚，不得民心，已經成為民怨升溫嘅導火線。尤其係投訴榜三甲等部門，工作範疇同民生息息相關，如果再唔改善，民間怒火無法降溫，港府遲早火燒後欄嘅咋！
咁啦，煲呔曾，領導人咪訓示你恪盡職守嘅，如果你唔想臨尾香嘅話，餘下半年唔該日日拜讀本報投訴版，按圖索驥活捉蛇王部門、失職官僚，等市民可以消消氣咯喎，到你落台嗰日，震耳欲聾嘅柴台聲或者可以細番啲嘅。