政情：唐唐「垃圾論」成風雲金句
有關下屆特首選舉嘅民調滿天飛，前行政會議召集人梁振英（CY）幾乎清一色領先，支持度一直被拋離嘅前政務司司長唐英年，尋日終於喺一項由電台舉辦嘅網上投票中威番次，當選二○一一年度風雲金句第一位，得獎金句係令佢民望大幅插水嘅「完全係垃圾」論，認真諷刺。
正所謂「一不離二」，獲選第二位嘅年度風雲金句亦同唐唐有關。唐唐早前承認有「感情缺失」，即係有婚外情，合和主席胡應湘為咗同唐唐解圍，竟然死撐話婚外情只係課外活動，意圖淡化事件，但旋即令「課外活動」一詞成為被追捧潮語，大受網民歡迎。
喺華懋爭產中落敗嘅陳振聰，獲網民選為風雲（火羅）人第一名，早前硬推替補機制惹起公憤後，仍獲升職做政務司司長嘅林瑞麟就排名第二。至於自發向市民派錢諷刺政府冷待窮人嘅「紫荊女俠」，亦獲選為風雲女士第四名，得票僅次於「好打得」嘅發展局局長林鄭月娥，紫荊女俠尋日更以一貫嘅低胸裝扮現身頒獎禮，不過就唔知係真身定係搵人假扮嘅。