政情：何鴻燊捐一千萬人民幣支持內地教育
賭王何鴻燊為善不甘後人，善業遍布大江南北，早前慷慨捐出一千萬元人民幣，支持仲愷農業工程學院白雲校區興建。校方投桃報李，除咗搵燊哥擔任學院副董事長，仲將其中一幢校董樓命名為「何鴻燊實驗大樓」，該學院落成暨校董樓揭牌儀式前日舉行，四太梁安琪代表燊哥出席。
大樓命名 銅像揭幕
身兼校董嘅澳博行政總裁蘇樹輝，前日亦陪伴梁安琪出席儀式，兩人齊為大樓內嘅何鴻燊博士銅像揭幕，見證歷史性時刻。銅像造型栩栩如生，相信燊哥睇見都好開心。查實燊哥早喺○八年已捐出八百萬元人民幣支持該校建設，前日再加碼捐多二百萬元人民幣，佢認為，掌握學問唔單止終身受用，仲惠澤社群，多年來捐建學校從不手軟。
講番出席揭幕儀式嘅嘉賓，仲有金利來太子爺曾智明，「牛仔褲大王」楊釗弟弟楊勳等。原來智明爸爸曾憲梓及楊勳都係善長，有份出錢出力支持該校建成。香港人咁熱心，校方都好識做，興建幾幢校董樓，除何鴻燊外，仲有「曾憲梓樓」及「楊釗楊勳樓」。