政情：離島區會內訌有戲睇
新一屆區議會明日履新，各區區議會正、副主席職位亦即將選出，原本以為建制派大勝會令選情風平浪靜，但其實各區議會背後風起雲湧。其中離島區議會更加係驚濤駭浪，該區一直由鄉事派獨領風騷，但今屆竟然罕有爆發內訌，若果協調不成，隨時會出現兩位鄉事派人物競逐，兩位主角分別係現任主席周玉堂及鄉議局主席劉皇發女婿余漢坤，真係要剝定花生等睇戲。
離島區議會過去一直由鄉議局副主席林偉強擔任主席，但自從佢失去坪洲鄉事委員會主席後，連帶當然區議員資格及主席都冇埋，由德高望重嘅南丫南鄉事委員會主席周玉堂順利接任。委任制名單日前出爐，林偉強冇份，正當各方都認為新一屆區議會主席由周玉堂冧莊之際，竟然殺出程咬金。鄉郊有風聲話，獲續委任為離島區議員嘅余漢坤四出放風要選主席，頓時令局勢充滿變數。
特首選委戰 辣慶離島鄉紳
消息人士話，離島一眾鄉委會主席對呢個情況大感不滿，除咗因為覺得離島區議會主席應該由離島鄉紳做番外，一眾主席對離島喺今次特首選委會選舉鄉議局界別中得番兩席都頗為憤怒，因為當初協調之時，講明離島可以有三席，點知長洲鄉委會主席翁志明竟然只得最低嘅五十七票落選。有離島中人認為，一定係鄉議局有勢力人士出手先會搞成咁，邊個做嘢可謂呼之欲出。
選委戰一役，結果令八個離島鄉委會主席早前聯署去信鄉議局，表明對選委選舉結果不滿，仲話要杯葛鄉議局一月搞嘅新春酒會添，睇嚟真係唔係講笑。有鄉議局中人亦透露，離島幾個鄉紳有意一齊缺席一月三日鄉議局某會議，以示不滿畀人一再打壓，但呢個行動仲係醞釀階段，成唔成事都未知。
余漢坤係發叔女婿，如果佢真係選區議會主席，你話冇外父支持真係冇人會信，我哋尋日試過搵余漢坤，可惜電話打極唔通，留言都冇人覆。記得余漢坤去年曾經話自己冇興趣做區議會主席，強調「一步一腳印」，唔會行一步諗十步後嘅嘢，唔通呢十步咁快就行完，希望再行一步登上區議會主席寶座？