中環出更：周松崗榮休《總裁快訊》送別
六十一歲嘅港鐵行政總裁周松崗尋日正式榮休，離開佢服務咗八年嘅鐵路公司。港鐵上下好多人都唔捨得佢走，上星期已預先搞咗個大型歡送派對，雖然冇超豪排場，但就有幾百個員工參與，輪流合照都影咗成個鐘，各部門仲送上別出心裁嘅禮物，場面既感人又溫馨。
招牌笑容幾十年如一日
歡送派對上星期喺九龍灣港鐵大廈大堂舉行，每個部門員工逐一送上餞別禮物。其中一份禮物別出心裁，就係由港鐵公關部門特別印製一份類似報章又似號外嘅《總裁快訊》，總結咗周總八年來嘅鐵路生涯，對佢有讚無彈之餘，當中仲印有周總後生嘅肥仔相，原來佢個招牌笑容幾十年如一日，保養得好好o架！
至於工程部班同事就去咗幾個新鐵路線嘅地盤執石仔，然後放入個靚盒度等周總懷念吓。車務部送咗件路軌嘅橫切面；市務部就整咗個金像獎，讚周總係港鐵最佳男主角。有兩位同事就演奏二胡同彈琴，最後一大班同事仲同周總合唱埋《千個太陽》，認真唔話得。