中環出更:名人齊捧李雲迪

卓妮早前講過,鋼琴王子李雲迪會開一場演奏會,賀中國銀行明年一百歲生日,呢場名為《李雲迪紅色‧浪漫演奏會》前晚喺灣仔會展舉行,由於呢場係佢今年首個以鋼琴表演中國音樂的演奏會,所以今年亦稱為「雲迪中國年」。好多官商名流知道雲迪開騷,都紛紛撐場,喺新年前享受一連串嘅優美樂章。

演繹中國經典名曲

去到會展,卓妮見捧場嘅名人賓客眾多,包括旅遊發展局主席田北俊夫婦、前九巴董事長陳祖澤夫婦、英皇集團主席楊受成、商人董建成夫婦、名媛張王幼倫及藝人等,當然唔少得中銀(香港)企業銀行及金融機構主管林廣明啦。雲迪開大騷,其父親亦一早現身到場為愛兒打氣。

雲迪話,今次演奏會分為上下兩場,上半場為蕭邦音樂,下半場為中國音樂,演繹多首中國經典名曲,希望將中國音樂帶到全世界。由於今次採用旋轉舞台,令現場觀眾細聽優美樂章之餘,亦能欣賞雲迪彈琴功架。演奏會仲特別找來○八年中國奧運開幕式代唱嘅楊沛宜,由幕後走到幕前親身獻唱,楊小妹妹經過悉心打扮,令人眼前一亮。

卓妮

第一手消息請下載on.cc東方互動iPhone/iPad/Android Apps
「Money18免費即秒股票報價網站」現推出8升級功能,財經資訊,實時實發!