政情：金刀梁幫安德尊改姓
身兼香港大學校務委員會主席嘅行政會議成員梁智鴻（金刀梁、圖），過去兩日頻頻為港大校長徐立之離任一事解畫，搞到好唔得閒。
尋日佢出席長者學苑活動時，頻頻讀錯藝人司儀安德尊個名，又錯叫社會福利署署長聶德權做局長，上台時仲連扣喺胸口嘅襟花都跌埋落地下，莫非佢因為徐立之離任一事搞到神不守舍？
大會請咗經常主持長者節目嘅安德尊嚟做司儀，金刀梁就以長者學苑發展基金委員會主席身份出席活動，但唔知點解金刀梁致詞時三番四次將安德尊個名讀咗成「祈德尊」，搞到安德尊都好無奈，惟有自嘲話自己叫「祈德尊」解窘。
不過，金刀梁似乎唔係睇錯字讀錯名，皆因真有祈德尊呢個人。祈德尊其實係前立法局同行政局非官守議員，而且仲曾經係企業家同軍人。至於點解金刀梁係咁讀錯呢個名就唔知喇。