政情：區選傳單充斥錯別字
下星期日就係區議會選舉，選民已經相繼收到候選人嘅宣傳單張。不過，我哋連續第二日發現有候選人嘅宣傳單張充斥錯別字，睇到啲選民一頭霧水。今次嘅主角就係屯門區議會屯門市中心選區候選人劉嘉麟，佢係上屆委任區議員嘅助理，今屆以獨立候選人身份參選，睇完佢嘅宣傳單張真係嚇一跳。
劉嘉麟嘅單張充斥錯別字，例如將「仁愛眼科中心」寫成「仨愛眼科中心」、「鑑於」寫成「監於」、「認受」寫成「認授」、「全情投入」寫成「全程投入」等等。作為一個強調喺選區「工作多年」嘅議員助理，競選單張都可以咁粗疏，真係貽笑大方。
劉嘉麟回覆查詢時話，因為時間趕急，無時間校對清楚就要攞去印製，話要同選民鄭重道歉咁話，佢仲強調遲啲入屋嘅宣傳單張會校對多幾次，肯定無問題先會寄畀班選民喎。屯門市中心其他三位候選人仲包括新民黨楊文達、民主黨陳家健及歐志遠。