政情：雙英攜眷搞形象工程
疑似特首候選人梁振英（CY）同唐英年尋日又出動落區，但今次唔係出席論壇闡釋政策理念，而係不約而同帶埋太太出席活動大晒恩愛，明眼人一睇就想營造住家男人嘅形象，大打溫情牌。
獲頒大紫荊勳章嘅CY，尋日早上帶同太太出席禮賓府舉行嘅授勳儀式，雖然二人嘅親密舉動唔多，但CY同太太拍埋一齊時笑容同眼神都好一致，臨離開前仲齊齊向在場傳媒揮手道別，因此曾引起一陣小騷動。
至於唐唐就喺下午帶同太太出席維園舉行嘅小母牛競步善行開幕禮，期間各自同朋友打招呼，唐唐仲同影帝任達華寒暄咗幾句，之後仲拉埋太太同華哥合照，唐太仲好大方話唔介意華哥夾喺佢同唐唐中間添。唐唐兩公婆大約逗留咗半個鐘後離開，但唐唐全程封口冇回應記者提問。